હવે ગૂજરાત માં ૭૫ માઇક્રોન સુધી ના પ્લાસ્ટિક પર લાગશે પ્રતિબંધ હવે ચોકલેટના રેપર,પાણી-આઇસક્રીમના કપને પ્લાસ્ટિકની ડિશો-ચમચીઓ બજારમાં જોવા નહીં મળે.

ડિસ્પોઝેબલ માર્કેટને મોટો ફટકો પડશે, નાના યુનિટોને રૂ.200 કરોડનું રોકણ કરવું પડશે. 25 સપ્ટેમ્બરથી ગુજરાતમાં 75 માઇક્રોનથી ઓછા પ્લાસ્ટિક પર સંપૂર્ણ પ્રતિબંધ. પ્લાસ્ટિક-ઉત્પાદકોએ ટકી રહેવા 5 લાખનો મોડિફિકેશનનો ખર્ચ કરવો પડશે.

સિંગલ યુઝ પ્લાસ્ટિક પોલિસી અંતર્ગત 75 માઇક્રોનથી નીચેના પ્લાસ્ટિક પર સપ્ટેમ્બરથી પ્રતિબંધ આવી રહ્યો છે. આ નીતિ અમલી બનશે તો બજારમાંથી પાણી અને આઈસક્રીમના પ્લાસ્ટિકના કપ, ચોકલેટ રેપર તેમજ નાસ્તા-ભોજન પ્રસંગે ઉપયોગમાં લેવાતી પ્લાસ્ટિકની ડિસ્પોઝેબલ ડિશો-ચમચીઓ બજારમાંથી ગાયબ થઈ જશે. દિવ્ય ભાસ્કરે આ પ્રકારના ઓછા માઇક્રોનની પ્લાસ્ટિક આઇટમોનું પ્રોડક્શન અંગે પ્લાસ્ટિક ઇન્ડસ્ટ્રીના લોકો સાથે વાત કરતાં જાણ્યું કે રાજ્યમાં આવા અંદાજે 3500 નાના ઉત્પાદકો છે અને તેમને કામ ચાલુ રાખવા માટે પોતાના યુનિટને અપગ્રેડ કરવા પડશે. આ અપગ્રેડેશન માટે એક યુનિટદીઠ આશારે રૂ.5 લાખ જેવો ખર્ચ આવી શકે છે. સંયુક્ત રીતે નાના યુનિટોને આમાં રૂ.200 કરોડ સુધીનો ચાંદલો ચોંટી શકે છે અને અંદાજે 70 હજાર લોકોની રોજગારીને પણ અસર થશે.

આ વિષય પર ગુજરાત રાજ્ય પ્લાસ્ટિક મેન્યુફેક્ચરર્સ એસોસિયેશનના પ્રેસિડેન્ટ શૈલેષ પટેલ સાથે વાતચીત કરી હતી, જેમાં તેમણે જણાવ્યું હતું કે સમગ્ર ગુજરાતમાં પ્લાસ્ટિકના 10થી 12 હજારની આસપાસ યુનિટ ચાલી રહ્યા છે, જેમાં તમામ પ્રકારની પ્લાસ્ટિકની આઈટેમો બને છે. એમાંથી 30 ટકા, એટલે કે અંદાજે 3500 આસપાસ યુનિટ એવા છે, જે 75 માઈક્રોનવાળા પ્લાસ્ટિકની પ્રોડક્ટસ બનાવે છે. એમાં કેરી બેગ, થર્મોકોલ, ચાના કપ સહિતની વસ્તુઓ સામેલ છે. ત્યારે હવે સરકાર 75થી ઓછા માઈક્રોનવાળા પ્લાસ્ટિક (સિંગલ યુઝ પ્લાસ્ટિક) પર પ્રતિબંધ લગાવશે તો એનું સૌથી વધુ નુકસાન 4000ની આસપાસ યુનિટોને પહોંચશે.